कचराच कचरा चोहीकडे, गेले नगरसेवक कुणीकडे?

समांतर क्रांती / खानापूर

खानापूर शहर म्हणजे कचऱ्याचे आगार बनले आहे. शहराच्या प्रमुख चौकांसह उपनगरात कचऱ्याचे साम्राज्य पसरले आहे. पण, याकडे लक्ष द्यायला नगरसेवक आणि नगर पंचायत प्रशासनाला वेळच नाही. कचरा रस्त्यावर टाकणाऱ्यांवर कारवाईची मोहीम हाती घेण्यात आली होती, पण ती मोहीमही तकलादू ठरली आहे.

शहरातील बसस्थानकासमोर मांगरीश हॉलच्या बाजुला परिसरातील दुकानदार बिनदिक्कत कचरा टाकत असल्याने कचऱ्याचा जणू डोंगर साचला आहे. हा कचरा रस्त्यावरर सुध्दा पसरत आहे. त्यामुळे तेथून ये-जा करणाऱ्या विद्यार्थ्यांसह नागरीकांना नाक मुठीत धरावे लागते. कचऱ्यामुळे कुत्र्यांचा प्रादूर्भाव वाढला असून धोका निर्माण झाला आहे.

शहरातील इतर भागांचीदेखील हीच स्थिती आहे. उपनगरांची तर दारूण आवस्था आहे. पण, नगरसेवकांचे शहराच्या स्वच्छतेकडे अजिबात लक्ष नाही. त्यामुळे नगर पंचायत सभागृह अस्तित्वात आहे की नाही, असा प्रश्न विचारला जात आहे.