एम.के.हुबळी येथील मलप्रभा साखर कारखान्याची निवडणूक २८ रोजी

समांतर क्रांती / खानापूर

एम.के.हुबळी येथील श्री मलप्रभा सहकारी साखर कारखान्याची निवडणूक २८ सप्टेबर रोजी होणार आहे. याबाबतची अधिसूचना निवडणूक अधिकारी आणि कित्तूर विकास प्राधिकाराच्या आयुक्त प्रभावती फकीरपूर यांनी जारी केली आहे. अचारसंहिता जारी करण्यात आली असून खानापूर आणि बैलहोंगल तालुक्यातील राजकारण पुन्हा एकदा रंगणार आहे.

निवडणूक वेळापत्रक जाहीर करण्यात आले असून १३ ते २० सप्टेंबरपर्यंत उमेदवारी अर्ज स्विकारले जाणार आहेत. २८ रोजी निवडणूक व त्याच दिवशी मतमोजणी होणार आहे. १५ जागांसाठी ही निवडणूक होणार आहे. त्यात सामान्य वर्ग ०९, महिलांसाठी राखीव ०२ तर अनुसूचीत जाती, जमाती, अ वर्ग आणि ब वर्गासाठी प्रत्येकी एका जागेचा समावेश आहे.

मलप्रभा साखर कारखान्याचे बैलहोंगल आणि खानापूर तालुका हे कार्यक्षेत्र असून खानापूर तालुक्यातील सभासदांची संख्या मोठी आहे. अलिकडे कारखान्यात मोठ्या प्रमाणात गैरव्यवहार झाल्याच्या आरोपावरून कारखाना चर्चेत आला आहे. तरीही या कारखान्याच्या निवडणुकीत खानापूर तालुक्याचे नेहमीच वर्चस्व राहिल्याने यावेळीदेखील निवडणूक रंगतदार ठरण्याची शक्यता आहे.